مقامة الكتمان والوجع الخفي ..

مقامة الكتمان والوجع الخفي ..

هكاك، وبصوت الحكاية اللي كاينة من القلب للقلب، قال السي محمد بن صالح القنيطري، الساكن بمراكش الحمرا، وسط حومة الناس والهموم:
بلغنا زمان قل فيه الصديق، وصار العبد هاز على كتافو من الهموم ما يهد الجبال، وهو مع ذلك غادي فالزنقة كيضحك فوجه الناس كأنه مولود فبهجة الدنيا. و أنا غادي ذات عشية فجنان مراكش ودروبها العتيقة، وكتعرفو مراكش وسرها، وقفت مع نفسي وقفة ديال واحد عيا من كثرة ما هاز بوحدو، وبديت كنهضر مع راسي ونقول:
«يا من أعزهم من أهلي وأحبهم .. هكذا أنا!
صابر فالشدايد وأشد أوجاعي، وساكت وفقلبي ألف قصة وقصة، كل قصة تحير العقل. ما عمري شكيت همي لبشري، الكتمان ولا هو الرفيق ديالي والرفيق الأبدي اه لأني ثرابي برج الجدي، اللي ما عمره خانني. تعلمت نخوض معاركي بصمت، ونخفي ورا ديك الضحكة والهدوء ديالي داكشي اللي تعجز الكلمات بوحدها على وصفه. حتى واحد ما شايف شحال كنقاوم، ولا شي حد عالم شحال من مرة تجاوزت وجعي وحدي، بلا ساند وبلا كتف، غير الله سبحانه وصبري اللي معي!
أنا محمد بن صالح القنيطري، تولدت فهاد المدينة العريقة، عشت ما فيه الكفاية باش نعرف بلي الرجال كتموت واقفة، وبلي الوجع الكبير هو اللي كيتكلع بلا صداع. شحال من ليلة دوزتها كنعصر على جراحي بيدي، وكنمسح دمعتي بكمي، ونصبح تاني غادي فحال إلى ما طاح ما حلا. الصمت ديالي ماشي ضعف، ولكن شموخ ديال واحد مأصل، عارف بلي السرار إلا خرجت تفضحات، والوجع إلا تبارطاجا كيزيد يثقل.»
ثم هبط راسو واحد الشوية، ونظر لسما مراكش وقت غروب الشمس، وقال بحرقة خارجة من صميم الروح:
هزيت همومي فكتفي ما شكيت لغير المولى
كتمت جراحي فوجهي، والدمعة لداخل تجرى
شحال من معركة خضتها وحدي، والليل عليا طال
أنا القنيطري ” وخا تيقولو ليا البيضاوي، حنت كبرت فيها ” الصابر، ولساني بالصمت تجلى
قال محمد:
فمنين ساليت هاد الهضرة مع نفسي، حسيت بواحد الراحة خفيفة بحال الشتا اللولية ففصل الصيف. أدركت بلي أعظم المعارك هي ديك اللي كنديروها وحدنا فالخفاء، وأرقى أنواع القوة هي اللي كاتخفي ورا الهدوء ديالها جبل ديال الوجع.
الله يرحم الحال، ويجعل الصبر دواء لكل من هز فقلبو هم كيف ما هزيتو أنا، وتبارك الله على كل واحد خاشي وجعو فقلبو وكايتبسم فوشوش الناس، وتيحاول يرسم البسمة فشفايهم.

 

محمد شيوي
/ مراكش

marocculturel

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *